POSH சட்டம் என்றால் என்ன? இந்தச் சட்டத்தின் கீழ் பெண்களுக்கு வழங்கப்பட்டுள்ள முக்கியமான உரிமைகள் என்ன?
POSH என்பது Prevention of Sexual Harassment என்பதன் சுருக்கமாகும். 2013ஆம் ஆண்டு இயற்றப்பட்ட Sexual Harassment of Women at Workplace (Prevention, Prohibition and Redressal) Act என்பது பணியிடங்களில் பெண்களுக்கு ஏற்படும் பாலியல் துன்புறுத்தலைத் தடுப்பதற்கும், புகார்களை விசாரிப்பதற்கும், உரிய நிவாரணம் வழங்குவதற்கும் கொண்டுவரப்பட்ட சட்டமாகும்.
இந்தச் சட்டம் பெண்களின் கண்ணியம், பாதுகாப்பு, சமத்துவம் மற்றும் சுதந்திரமாகப் பணிபுரியும் உரிமையைப் பாதுகாக்கிறது.
பெண்களுக்கு உள்ள முக்கிய உரிமைகள்:
பாலியல் துன்புறுத்தல் இல்லாத பணிச்சூழலில் பணிபுரியும் உரிமை.புகார் அளித்து நியாயமான விசாரணை பெறும் உரிமை.
புகார் மற்றும் விசாரணை விவரங்களின் ரகசியத்தன்மையைப் பாதுகாக்கும் உரிமை.விசாரணையின்போது சட்டத்தில் வழங்கப்பட்டுள்ள இடைக்கால நிவாரணங்களைக் கோரும் வாய்ப்பு.புகார் அளித்ததற்காகப் பழிவாங்கும் நடவடிக்கைகளை எதிர்கொள்ளும்போது உரிய பாதுகாப்பு கோரும் உரிமை.ஒரு பெண் வேலைக்குச் செல்லும்போது தனது திறமையை நிரூபிக்க வேண்டுமே தவிர, தனது கண்ணியத்திற்காகப் போராட வேண்டிய நிலை இருக்கக்கூடாது.
2: பணியிடத்தில் பாலியல் துன்புறுத்தல் என்பது உடல் ரீதியான செயல்களை மட்டுமே குறிக்கிறதா? வார்த்தைகள், பார்வைகள், குறுஞ்செய்திகள் போன்றவையும் சட்டப்படி குற்றமாகக் கருதப்படுமா?
இல்லை. பாலியல் துன்புறுத்தல் என்பது உடல் ரீதியான தொடுதல் அல்லது அணுகுமுறையுடன் மட்டும் முடிந்துவிடுவதில்லை.
POSH சட்டத்தின் பிரிவு 2(n)-ல் குறிப்பிடப்பட்டுள்ள பாலியல் துன்புறுத்தல் நடத்தைகளில், விரும்பத்தகாத உடல் ரீதியான அணுகுமுறை, பாலியல் சலுகைகளைக் கோருதல், பாலியல் சார்ந்த கருத்துகள் தெரிவித்தல், ஆபாசமான உள்ளடக்கங்களைக் காட்டுதல் மற்றும் பாலியல் தன்மை கொண்ட விரும்பத்தகாத வாய்மொழி அல்லது சொற்களற்ற நடத்தை ஆகியவை அடங்கும்.
உதாரணமாக:
பாலியல் நோக்கத்துடன் விரும்பத்தகாத கருத்துகளைத் தெரிவித்தல்.பாலியல் சலுகைகளுக்காகப் பதவி உயர்வு அல்லது வேலைவாய்ப்பை நிபந்தனையாக வைத்தல்.விரும்பத்தகாத பாலியல் குறுஞ்செய்திகள் அல்லது படங்களை அனுப்புதல்.பாலியல் தன்மை கொண்ட சைகைகள் அல்லது நடத்தைகள் மூலம் அசௌகரியத்தை ஏற்படுத்துதல்.
ஆனால், ஒவ்வொரு பார்வையையும் அல்லது ஒவ்வொரு குறுஞ்செய்தியையும் தானாகவே பாலியல் துன்புறுத்தல் என்று கூற முடியாது. அதன் தன்மை, சூழ்நிலை, நோக்கம் மற்றும் சம்பவங்களின் தொடர்ச்சி ஆகியவை பரிசீலிக்கப்பட வேண்டும்.
முக்கியமாக, உடல் ரீதியான துன்புறுத்தல் நிகழ்ந்த பிறகுதான் சட்டத்தை அணுக வேண்டும் என்பதில்லை.
3: அலுவலகங்களில் பணிபுரியும் பெண்களைத் தவிர, வீட்டு வேலை செய்பவர்கள், தினக்கூலிப் பெண்கள், சிறு நிறுவனங்களில் பணிபுரிபவர்கள் ஆகியோருக்கும் இந்தச் சட்டம் பொருந்துமா?
ஆம். POSH சட்டத்தின் வரையறை வழக்கமான அலுவலகங்களைத் தாண்டியும் விரிவாகப் பொருந்துகிறது.
வீட்டு வேலை செய்பவர்கள், தினக்கூலிப் பெண்கள், ஒப்பந்தத் தொழிலாளர்கள் மற்றும் சிறு நிறுவனங்களில் பணிபுரியும் பெண்களும் சட்டத்தின் பாதுகாப்பைப் பெறக்கூடும்.
பத்து அல்லது அதற்கு மேற்பட்ட பணியாளர்களைக் கொண்ட பணியிடங்களில் Internal Committee அமைக்கப்பட வேண்டும். பத்துக்கும் குறைவான பணியாளர்களைக் கொண்ட பணியிடங்களில் அல்லது முதலாளிக்கு எதிரான புகார்களில், சட்டத்தின் பிரிவு 6-ன் கீழ் மாவட்ட அளவில் அமைக்கப்படும் Local Committee-யை அணுகலாம்.ஒரு பெண் பெரிய நிறுவனத்தில் வேலை செய்கிறாரா, சிறிய கடையில் வேலை செய்கிறாரா அல்லது ஒரு வீட்டில் வேலை செய்கிறாரா என்பது மட்டும் அவரது கண்ணியத்திற்கான உரிமையைத் தீர்மானிக்காது.
4: ஒரு பெண் தனது மேலதிகாரியால் பாலியல் துன்புறுத்தலுக்கு ஆளானால், வேலை பறிபோகும் என்ற அச்சமின்றி சட்டரீதியாக எவ்வாறு நடவடிக்கை எடுக்கலாம்?
பல பெண்கள் எதிர்கொள்ளும் மிகப்பெரிய பிரச்சினை பாலியல் துன்புறுத்தல் மட்டுமல்ல; புகார் அளித்தால் வேலை பறிபோய்விடுமோ என்ற பயமும்தான்.முதலில், சம்பவத்தின் தேதி, நேரம், இடம், நடந்த நிகழ்வுகள் போன்ற விவரங்களைப் பதிவு செய்ய வேண்டும்.
மின்னஞ்சல்கள், குறுஞ்செய்திகள் மற்றும் பிற தொடர்புடைய ஆதாரங்களையும் பாதுகாக்க வேண்டும்.பின்னர், நிறுவனத்தின் Internal Committee-யிடம் புகார் அளிக்கலாம். குழு இல்லாதபோது அல்லது சட்டத்தில் குறிப்பிடப்பட்ட சூழ்நிலைகளில் Local Committee-யை அணுகலாம்.
POSH சட்டத்தின் பிரிவு 12-ன் கீழ், விசாரணை நடைபெறும் காலத்தில் சட்ட நிபந்தனைகளுக்கு உட்பட்டு இடைக்கால நிவாரணங்களைக் கோரலாம். உதாரணமாக, பாதிக்கப்பட்ட பெண்ணையோ எதிர்மனுதாரரையோ வேறு பணியிடத்திற்கு மாற்றுவது அல்லது பெண்ணுக்கு சட்டத்தில் குறிப்பிடப்பட்ட விடுப்பு வழங்குவது போன்ற பரிந்துரைகள் செய்யப்படலாம்.
புகார் அளித்ததற்காகப் பழிவாங்குதல், மிரட்டுதல் அல்லது சட்டவிரோதமாக வேலைநீக்கம் செய்தல் போன்றவை ஏற்பட்டால், சம்பவத்தின் தன்மைக்கேற்ப உரிய சட்ட நடவடிக்கைகளைப் பரிசீலிக்கலாம்.புகார் அளித்த பெண்ணின் வாழ்க்கையைப் பாதிப்பதற்குப் பதிலாக, புகார் அளிக்க வேண்டிய சூழலை உருவாக்கிய நடத்தையைச் சரிசெய்வதே நிறுவனத்தின் நோக்கமாக இருக்க வேண்டும். “அடுத்த வாரம்: POSH புகார் – எங்கு, யாரிடம், எப்படி அளிப்பது?”